Jista’ jkun li tkun meħtieġ taħdem fl-għoli f’diversi ċirkostanzi, kemm f’xi port jew f’xi baċir, abbord xi bastiment, f’ajruport, jew fil-bini ta’ xi kummerċjant jew post ieħor li ma tkunx familjari miegħu. Ir-riskji huma l-istess u għandek tieħu l-prekawzjonijiet meħtieġa. Jekk ma tkunx sodisfatt li tista’ taħdem mingħajr periklu, m’għandekx tagħmel dan sakemm tkun sodisfatt li t-tagħmir xieraq ikun f’postu jew li jkunu ttieħdu l-prekawzjonijiet meħtieġa.
1. X’inhu x-xogħol fl-għoli?
Ix-xogħol fl-għoli jfisser xogħol fi kwalunkwe post fejn, jekk ma jittiħdux prekawzjonijiet, tista’ taqa’ u tkorri.
Jekk inti:
- taħdem ’il fuq mill-art,
- tista’ taqa’ minn xifer ta’ post ogħla mill-art (vettura, kontejner jew kompartiment tal-merkanzija), jew
- tista’ taqa’ mill-wiċċ tal-art f’xi fetħa fl-art jew ħofra fl-art
tkun qed taħdem fl-għoli fi kwalunkwe sitwazzjoni fejn tista’ taqa’ minn livell għall-ieħor.
Eżempji ta’ xogħol fl-għoli jinkludu:
- l-aċċess għaż-żona tat-tagħbija ta’ vettura jew ta’ ferrovija jew ta’ kontejner;
- xogħol fuq is-saqaf ta’ bawżer tat-triq jew tal-ferroviji, bastiment jew kontejner (sabiex tiċċekkja l-bokkaporti ta’ spezzjoni);
- l-użu ta’ slielem jew skalapiżi sabiex titla’ fuq bastimenti, bawżers, sajlos u tankijiet tal-ħażna;
- l-użu ta’ pjattaformi tax-xogħol bħal tavluni, tavluni fuq diversi sulari (tower scaffolds), cherry-pickers, scissor lifts u skalapiżi industrijali (podium steps).
2. Xi prekawzjonijiet għandi nieħu?
Tinsiex: ix-xogħol fl-għoli jista’ jkun ta’ darba fill, jew parti mir-rutina tiegħek. Kun żgur li tidentifika l-kompiti kollha li jeħtieġu xogħol fl-għoli, sabiex tkun tista’ tagħmilhom mingħajr periklu. Is-sigriet għall-prevenzjoni ta’ korrimenti jekk ikollok taħdem fl-għoli huwa li tagħmel valutazzjoni tar-riskju, sabiex tkun tista’ tieħu l-prekawzjonijiet xierqa.
Il-valutazzjonijiet tar-riskju u l-prattiki ta’ xogħol bla periklu għandhom isiru għall-attivitajiet kollha li jinvolvu xogħol fl-għoli.
3. Tista’ tevita l-ħtieġa li taħdem fl-għoli?
F’ċerti ċirkostanzi, jista’ jkun impossibbli li tevita li taħdem fl-għoli. Madankollu, għandek dejjem teżamina u tieħu kampjun tat-tagħbija f’żona adattata. Dan normalment ifisser li l-oġġetti għandhom jitneħħew mill-kontejner jew mill-vettura u jitqiegħdu f’żona ċatta, biex b’hekk tevita l-ħtieġa li taħdem fl-għoli.
Jekk tkun qed taħdem f’post jew f’sitwazzjoni li ma tkunx familjari magħha, għandek tikkunsidra r-riskji b’attenzjoni u ma tkomplix teżamina u tieħu kampjuni sakemm tkun żgur li tista’ tagħmel dan mingħajr periklu.
4. Tista’ tipprevjeni waqgħa?
Iva tista’ billi:
- tuża post tax-xogħol eżistenti li huwa diġà sigur, eż. b’poġġamani permanenti jew b’parapett madwar ix-xifer, jew parti minn impjant jew tagħmir li għandu poġġamani fissi jew permanenti madwaru;
- tuża tagħmir għax-xogħol. Jekk ma tistax tuża post tax-xogħol eżistenti, ikkunsidra jekk tistax tuża tagħmir għax-xogħol sabiex tevita li jaqgħu xi persuni. It-tavluni fuq diversi sulari, l-iskalapiżi industrijali, iċ-cherry-pickers u s-scissor lifts huma eżempji komuni ta’ tagħmir li jservi għal dan l-iskop, peress li dawn il-pjattaformi għandhom il-poġġamani.
Tużax metodi improvizzati sabiex tilħaq il-post li trid — bħal xi palit fuq trakk b’fork-lift.
- Jekk tkun teħtieġ aċċess regolari, pereżempju sabiex tispezzjona l-bokkaporti fuq il-bawżers tat-triq jew ta’ xi ferrovija, għandek tikkunsidra li tinstalla pjattaformi ta’ aċċess speċjali.
Evita li tuża slielem jew skalapiżi mhux marbuta jew mingħajr irfid fejn ikun possibbli (ara s-sezzjoni dwar l-użu tas-slielem).
- Jekk ma tistax tistabbilixxi miżuri sabiex tipprevjeni xi waqgħa, għandek tipprova tillimita r-riskju billi tnaqqas l-għoli u/jew il-konsegwenzi.
5. Tista’ tnaqqas il-konsegwenzi ta’ waqgħa?
L-ewwel għandek tipprova tevita u mbagħad tipprevjeni waqgħa qabel ma ddur għal miżuri li jnaqqsu jew jillimitaw biss il-konsegwenzi. Ix-xbieki tas-sigurtà huma eżempju wieħed ta’ miżuri bħal dawn, għaliex dawn għandhom inaqqsu r-riskju ta’ korriment jekk xi ħadd jaqa’. It-tagħmir li jżommok milli taqa’ wkoll inaqqas il-korrimenti, iżda dawn jeħtieġu installazzjonijiet u taħriġ speċjali.6. X’miżuri addizzjonali oħrajn teħtieġ sabiex tnaqqas ir-riskju ta’ xi waqgħa?
Meta tuża kwalunkwe tagħmir għax-xogħol mill-għoli, għandek tassigura wkoll:
- li jikkonforma ma’ standards internazzjonali jew normi Ewropej;
- li jkun spezzjonat regolarment u miżmum tajjeb;
- li l-persuni li jużawh huma mħarrġa li jużawh mingħajr periklu; u
- li x-xogħol ikun issorveljat sabiex wieħed jara li l-persuni jkunu qegħdin jaħdmu mingħajr periklu.
L-użu normali ta’ slielem jew skalapiżi ma jinkludix miżuri għall-prevenzjoni ta’ waqgħat jew għat-tnaqqis tal-konsegwenzi. Għaldaqstant għandek tkun kapaċi turi li ma kienx raġonevoli li tagħżel tagħmir alternattiv minħabba li l-kompitu huwa ta’ riskju baxx u għal ftit ħin.
7. Rajt jekk hemmx xi wċuħ fraġli?
Teħtieġ li tkun partikolarment konxju dwar kwalunkwe materjal fraġli fi, jew qrib, iż-żona fejn tkun qed taħdem fl-għoli minħabba li dawn iżidu r-riskju. Wiċċ fraġli aktarx li jinkiser jekk xi ħadd jaħdem fuqu jew jaqa’ fuqu. Eżempji komuni jinkludu l-folji tas-saqaf magħmula mill-fibra jew mis-siment tal-asbestos u bosta tamboċċi, iżda wkoll pontijiet fis-sajlos.
Kun żgur li:
- tevita l-ħtieġa li taħdem fuq jew qrib uċuħ fraġli jew li tgħaddi minn fuqhom, eż. billi taħdem minn taħthom permezz ta’ tavluni fuq diversi sulari jew minn fuqhom permezz ta’ cherry-picker;
- tipprevjeni waqgħa billi tuża passaġġi fissi bil-poġġaman sabiex tgħaddi minn fuq saqaf fraġli magħmul minn siment tal-asbestos jew uża pjattaformi adattati għax-xogħol bil-poġġaman meta taħdem fuq jew qrib wiċċ fraġli;
- tnaqqas il-konsegwenzi ta’ waqgħa billi tuża xbieki, boroż tal-arja jew tagħmir li jżommok milli taqa’.
8. Hemm xi riskji oħrajn assoċjati max-xogħol fl-għoli?
Tinsiex li x-xogħol fl-għoli jista’ jġib ukoll riskji oħrajn miegħu:
- It-tagħmir ta’ aċċess jista’ jġibek qrib soqfa baxxi jew strutturi oħrajn. Dejjem iċċekkja qabel tuża t-tagħmir u ilbes tagħmir ta’ protezzjoni tar-ras.
- Perikli ta’ żliq: L-uċuħ jistgħu jkunu ta’ periklu akbar minħabba ilma, silġ jew tiċpis ta’ materjal ieħor.
- Perikli ta’ tfixkil f’oġġetti: It-tagħmir ta’ aċċess jista’ jkollu marbutin miegħu kejbils, ħbula jew oġġetti oħrajn li tista’ titfixkel fihom.
- Xokkijiet: It-tagħmir ta’ aċċess jista’ jġibek qrib kejbils għaddejjin fl-għoli. It-torrijiet tal-metall jew tagħmir ieħor għandhom jinżammu ’l bogħod sew mill-kejbils kollha għaddejjin fl-għoli, irrispettivament mill-vultaġġ jew l-użu.
