It-Tagħmir ta’ Protezzjoni tas-Smigħ
Is-Saħħa u s-Sigurtà

Ħoss jista’ jkun irritanti. Jekk ikun kbir jew idum sejjer għal ħin twil jista’ wkoll jikkawża danni temporanji jew permanenti fis-smigħ. L-aħjar mod kif tnaqqas ir-riskju ta’ ħsara fis-smigħ tiegħek huwa billi telimina jew tnaqqas il-livell tal-istorbju mis-sors tiegħu.

Peress li dan mhux dejjem ikun possibbli, jeżistu diversi tipi ta’ tagħmir ta’ protezzjoni tas-smigħ. Dawn huma mfassla sabiex inaqqsu l-ammont ta’ ħoss għal livell li ma jagħmilx ħsara lis-smigħ.

• Tappijiet tal-widnejn: Dawn jistgħu jkunu tappijiet tat-tajjar miksija bix-xama’ li jintremew wara l-użu maħsuba sabiex jiddaħħlu fil-kanal tal-widna, jew inkella tappijiet tal-widnejn li jintużaw aktar minn darba u li jinħaslu wara l-użu. Dan il-varjetà tal-aħħar tista’ tkun ipprovduta b’ċinga għal taħt il-geddum/fuq ir-ras jekk ikun meħtieġ.
• Protetturi tal-widnejn (ear defenders): Dawn ikunu f’għamla ta’ tazza iebsa għal kull widna b’siġill magħmul minn kuxxinett artab li huma mfassla sabiex jiffittjaw fuq il-widnejn. Dawn ikunu magħqudin ma’ xulxin b’faxxa iebsa u għat-tond, li żżomm it-tazez sodi mal-widnejn, jew jistgħu jitwaħħlu ma’ elmu tas-sigurtà jekk ikun meħtieġ. Is-siġilli fihom likwidu jew ragħwa tal-plastik li jnaqqas il-livell tal-ħoss, iżda xorta waħda tkun tista’ tisma’ konverżazzjoni normali minnhom.

• It-tappijiet tal-widnejn huma mfassla għall-użu għal żmien qasir, eż. nofs siegħa (jistgħu jintużaw għal aktar ħin f’każ ta’ protezzjoni kontra livelli aktar baxxi ta’ ħoss). Għal-livelli għoljin ħafna ta’ ħoss, eż. mill-magni tal-ajruplani, għandhom jintużaw il-protetturi tal-widnejn. Xi wħud isibu t-tappijiet tal-widnejn skomdi, u jistgħu wkoll iżidu r-riskju ta’ infezzjoni fil-widnejn jekk ma jinżammux nodfa ħafna.
• Il-protetturi tal-widnejn xi drabi jistgħu jkunu skomdi f’ambjenti sħan ta’ xogħol u l-livell tal-ħoss inaqqsuh biss — mhux jeliminawh. Għandek tara li jkunu jiffittjaw tajjeb, bis-siġilli jmissu minn kullimkien mal-ġenb ta’ rasek.

It-tagħmir ta’ protezzjoni tas-smigħ għandu jintlibes kull fejn aktarx li tiltaqa’ ma’ ħsejjes qawwija waqt li tkun qed taħdem. L-aktar żona ovvja hija fuq it-tarmak tal-ajruport, fejn anki espożizzjoni qasira għall-ħoss ta’ magna ta’ ajruplan tista’ twassal għal ħsara fit-tul jew irreversibbli fis-smigħ.

Skont il-leġiżlazzjoni dwar is-saħħa u s-sigurtà, ċerti żoni jkunu kklassifikati bħala ‘żoni li jeħtieġu tagħmir ta’ protezzjoni tal-widnejn’. Is-sinjal muri hawnhekk jitqiegħed kull fejn il-protezzjoni tas-smigħ hija obbligatorja.

• It-tappijiet tal-widnejn: Żomm it-tappijiet tal-widnejn li jintużaw aktar minn darba f’post frisk u nadif. Wara li tużahom aħsilhom b’deterġent ħafif u xi kultant imsaħhom b’soluzzjoni ta’ diżinfettant ħafif. Qatt m’għandek tħallihom jixxarbu. Għandek tifli t-tappijiet tal-widnejn sew qabel tużahom sabiex tara li ma jkun fihom l-ebda sinjal ta’ tkagħbir minħabba l-użu.
• Il-protetturi tal-widnejn: Spezzjonahom tajjeb b’mod regolari sabiex tkun żgur li m’għandhomx xi ħsara jew li qdiemu. Jekk ikollhom xi ħsara, il-protetturi tal-widnejn mimlija bil-likwidu aktarx li jibdew inixxu. Tgħawwiġx il-faxxa ta’ fuq ir-ras peress li dan jista’ jnaqqas l-effiċjenza tal-protetturi tal-widnejn. Imsaħhom minn żmien għal żmien b’soluzzjoni ta’ diżinfettant ħafif u erfagħhom f’post nadif meta ma tkunx qed tużahom.