Dan huwa eżempju tas-sistema ta’ xogħol sigur li tintuża f’Dover (UK). Dover huwa port multimodali li jittratta l-aktar it-traffiku roll-on-roll-off iżda wkoll banana bl-ingrossa u frott ieħor mill-Karibew u mill-Afrika tal-Punent. Tkopri kemm operazzjonijiet ġenerali kif ukoll dmirijiet speċifiċi.
IT-TAGĦRIF ĠENERALI
Il-punti li ġejjin huma marbuta mat-tħassib ta’ saħħa u sigurtà identifikati b’riżultat tal-aħħar valutazzjonijiet tar-riskji għas-saħħa u s-sigurtà. Dan id-dokument ikopri l-operazzjonijiet fuq barra.
ILBIES
- Il-ġkieket b’viżibbiltà għolja għandhom jintlibsu f’kull ħin fiż-żoni fuq barra fejn tiġi kklerjata l-merkanzija (inklużi ż-żoni tal-ispezzjoni u l-korsiji tal-issiġillar). Dan huwa rekwiżit tas-saħħa u s-sigurtà.
- Il-ġkieket b’viżibbiltà għolja li jitqattgħu jew li jkunu tilfu l-kulur għandhom jinbidlu.
- Iż-żraben bil-qiegħ mikul għandhom jinbidlu.
- Wieħed għandu joqgħod attent li jneħħi l-ġojjellerija kollha (ċrieket, imsielet, eċċ.) u ċertu lbies (ingravajjet) waqt xogħol ta’ spezzjoni jew ta’ ssiġillar jekk ikun hemm periklu li jinqabdu fil-pakketti, eċċ.
- Għandhom jintlibsu brieret iebsin jekk ikollok bżonn tidħol f’vettura b’saqaf baxx.
- Għandhom jintlibsu brieret iebsin waqt xogħol f’żona indikata bħala żona tal-brieret iebsin (eż. iż-żona tal-merkanzija f’massa fil-Baċiri tal-Lvant).
IL-PASSAĠĠI SIGURI
- Il-passaġġi siguri huma pprovduti sabiex tkun assigurata s-sigurtà tal-persuni miexja. Dawn għandhom jintużaw jekk il-persunal ikun jeħtieġ li jimxi fiż-żona tal-ikklerjar tal-merkanzija.
IT-TRAFFIKU
- Fil-preżent m’hemmx passaġġi siguri fiż-żona tal-karozzi pparkjati. Wieħed għandu joqgħod attent meta jaqsam din iż-żona u jidħol fl-uffiċċju.
- Is-sewwieqa għandhom isegwu s-sinjali tat-traffiku jew jobdu l-istruzzjonijiet tal-Marixxalli tat-Traffiku tal-Port ta’ Dover jew tal-pulizija (b’mod speċjali fil-Baċiri tal-Lvant).
- Fil-Baċiri tal-Lvant dawk il-persuni miexja għandhom ikunu jafu li l-vetturi tal-port għandhom prijorità fil-passaġġi pedonali u s-sewwieqa mhux bilfors jieqfu biex iħalluk taqsam.
L-OPERAZZJONIJIET TA’ SPEZZJONI U TA’ SIĠILLAR
IT-TIPJIP
- Ma jistax isir tipjip fiż-żoni tal-ispezzjoni jew tas-siġillar.
L-AMBJENT
- L-operazzjonijiet ta’ spezzjoni u ta’ siġillar għandhom isiru fiż-żoni indikati biss.
- Il-persunal qatt m’għandu jidderieġi t-traffiku ġo, barra minn, jew fiż-żoni stess ta’ spezzjoni jew ta’ siġillar. Jekk ikun hemm konġestjoni ta’ traffiku din għandha tkun irrapportata lill-Aġenzija tas-Servizz tal-Port jew lill-Kontroll tat-Terminal tal-Port ta’ Dover. Jekk jinġema’ skart jew fdalijiet u jixxerred xi fjuwil, dan għandu jkun irrapportat lill-Aġenzija tas-Servizz tal-Port jew lill-Kontroll tat-Terminal tal-Port ta’ Dover.
- Oqgħod attent meta t-trakkijiet bil-fork-lift jew il-makkinarju jkunu qegħdin jaħdmu. Jekk attività bħal din toħloq riskju għalik għandek titlob lis-sewwieq/lill-operatur jieqaf mix-xogħol sakemm inti tkun lestejt xogħlok
- L-operazzjonijiet ta’ spezzjoni u ta’ ssiġillar għandhom isiru biss meta l-magni tal-vetturi jkunu mitfija u s-sewwieq ikun ħareġ mill-kabina. Dejjem żomm id-distanza minn vetturi miexja.
IL-KORSIJI TAL-ISSIĠILLAR — L-UŻU TA’ BARRIERI
- Ġew installati barrieri f’nofs il-korsiji tal-issiġillar.
L-għan tagħhom huwa li:
- jitnaqqas ir-riskju ta’ vetturi kbar li jkunu qegħdin iġorru l-merkanzija milli jolqtu lil xi ħadd li jkun qed jissiġilla xi vettura;
- jipprevjeni li vetturi oħrajn jibqgħu deħlin f’dawn il-korsiji.
Fl-aktar perjodi ta’ xogħol intensiv it-traffiku jkun miexi bil-mod u aktarx li jkun kbir, u għalhekk l-użu tal-barrieri jista’ ma jkunx prattiku. F’dawn iż-żminijiet u meta l-barrieri ma jintużawx, ħu prekawzjonijiet oħrajn imsemmija fis-sistema ta’ xogħol mingħajr periklu.
F’perjodi inqas intensivi t-traffiku aktarx li jimxi aktar u, għaldaqstant, jista’ jkun inqas ikkontrollat. F’dawn iż-żminijiet il-korsiji jkollhom jingħalqu bil-barrieri waqt li jkun qed isir ix-xogħol. Wieħed għandu joqgħod attent li ma jinqabdux is-swaba’ meta wieħed juża l-barrieri. Il-persunal għandu joqgħod attent ukoll meta jkun qed ibaxxi l-barrieri (eż. evita li tolqot lil xi ħadd ieħor).
L-IMMANIĠĠJAR BL-IDEJN
- Il-persunal kollu għandu josserva l-pariri tat-‘Taħriġ għall-Immaniġġjar bl-Idejn’ dwar kif għandek terfa’ oġġett.
- L-Aġenzija tas-Servizz tal-Port għandha tintuża sabiex jinħattu l-oġġetti u jiġu ppreżentati għall-ispezzjoni.
- Il-persunal m’għandux jitla’ fuq l-oġġetti, iġorr kaxxi tqal jew jiftaħ kaxxi jew kannestri.
- Tiftaħx trejlers peress li l-oġġetti ta’ ġo fihom jistgħu jinqalbu ’l barra.
- Qatt m’għandek tgħin lis-sewwieqa jsewwu xi vettura.
IS-SUSTANZI PERIKOLUŻI
- Għandek tikkunsidra liema perikli tista’ toħloq sustanza qabel tagħmel spezzjoni. Jekk ikollok xi dubju, tkomplix l-ispezzjoni.
- Qatt m’għandek ixxomm jew idduq oġġetti waqt l-ispezzjoni.
L-ATTENDENZA TAL-PERSUNAL WAQT L-ISPEZZJONIJIET
- Qatt m’għandek tagħmel spezzjoni mingħajr ma jkun hemm xi ħadd ieħor preżenti (eż. rappreżentant tal-Aġenzija tas-Servizz tal-Port, aġent marittimu jew kollega).
- Il-membri ġodda tal-persunal għandhom ikunu akkumpanjati minn kollega b’aktar esperjenza.
- Żewġ membri tal-persunal għandhom jagħmlu l-ispezzjonijiet tal-merkanzija:
- fiż-żona tal-merkanzija f’massa tal-Fergħa tal-Lvant;
- fil-friża;
- fl-imħażen kiesħa.
IL-FRIŻA FIL-BAĊIRI TAL-LVANT
- L-Istruzzjonijiet tal-Port ta’ Dover għandhom ikunu segwiti.
- Kull min jidħol fil-friża għandu jkun fiżikament b’saħħtu.
- L-ilbies protettiv għandu jintlibes f’kull ħin.
- Qatt m’għandek tidħol ġol-friża waħdek.
- Qatt m’għandek taħdem fil-kamra għal aktar minn 50 minuta kull darba (wara 50 minuta ħu pawża ta’ 15-il minuta).
- L-Aġenzija tas-Servizz tal-Port għandha tkun innotifikata dwar l-attività kollha fil-friża.
- L-art tista’ tkun tiżloq. Oqgħod attent meta tkun miexi fiż-żona ta’ spezzjoni.
- Il-friża għandha tkun imbattla mill-fdalijiet jew mill-oġġetti maħżuna. Irrapporta kwalunkwe problema lill-Kontroll tat-Terminal tal-Port ta’ Dover.
