It-tagħmir ta’ monitoraġġ tal-gass
Is-Saħħa u s-Sigurtà

It-tagħmir ta’ monitoraġġ tal-gass huwa maħsub sabiex jindividwa u jwissik dwar atmosferi potenzjalment perikolużi f’postijiet magħluqa. Dawn it-‘twissijiet bikrija’ għandhom jgħinuk tiddeċiedi:

• jekk tistax tidħol fi spazju magħluq mingħajr periklu; u
• jekk l-atmosfera hijiex sigura biżżejjed biex inti tkompli taħdem fiha.

Huwa speċjalment importanti għall-monitoraġġ ta’ sustanzi kimiċi tal-fumigazzjoni meta jkunu qed jiġu spezzjonati jew żvojtati l-kontejners.

Għall-immaniġġjar tal-kontejners iffumigati, ara:

• Ix-xogħol mingħajr periklu fil-Baċiri u fiż-Żoni tal-merkanzija - L-ispezzjonar ta’ merkanzija u kontejners
• Is-Sustanzi Perikolużi - Il-Fumiganti

Hemm żewġ tipi distinti ta’ tagħmir ta’ monitoraġġ tal-gass disponibbli.

Il-miters tal-ossiġnu: Dawn ikejlu l-perċentwal ta’ ossiġnu fl-atmosfera, li għandu jkun madwar 20.9% tal-arja. Dawn jagħtuk sinjal ta’ twissija li tisimgħu u tarah jekk il-livell:

• jaqa’ taħt id-19% (periklu għall-ħajja); jew
• jaqbeż it-23 % (periklu ta’ nirien/splużjoni).

Dawn jiġu mgħammra b’earphone li tintuża f’żoni storbjużi, aspiratur biex tkun tista’ tieħu kampjun minn ċerta distanza u klipp għall-qadd.

Tinsiex: il-miters tal-ossiġnu jkejlu biss il-livelli tal-ossiġnu — u mhux gassijiet oħrajn.

Il-moniters personali għal diversi gassijiet: Dawn jindividwaw gassijiet perikolużi u fl-istess waqt jimmonitorjaw il-livell ta’ ossiġnu fl-arja. Dawn jipprovdu twissija f’każijiet ta’:

• nuqqas ta’ ossiġnu (inqas minn 19% fl-arja);
• ossiġnu żejjed (aktar minn 23% fl-arja);
• livelli perikolużi ta’ metanu (li jista’ jaqbad u jisplodi); u
• livelli perikolużi ta’ sulfid tal-idroġenu (velenuż u jista’ jaqbad).

Użah sabiex tittestja l-atmosfera, kemm qabel tidħol f’post magħluq kif ukoll waqt li tkun ġo fih. M’għandekx tidħol f’post magħluq jekk ma jkollokx tagħmir ta’ monitoraġġ tal-gass disponibbli. Meta tkun qed taħdem f’post magħluq, jekk idoqq l-allarm għandek tilbes minnufih l-ELSA tiegħek (l-apparat ta’ emerġenza ta’ sostenn għall-ħajja) u tħalli l-post. Qatt m’għandek tkompli taħdem waqt li tkun liebes l-ELSA.

Tinsiex: it-tagħmir ta’ monitoraġġ tal-gass huwa apparat speċjalizzat ħafna. Għandu jintuża biss minn persuni li jkunu tħarrġu fil-mod kif jintuża.

Il-miters tal-ossiġnu

L-istruzzjonijiet dwar il-kura u l-manutenzjoni jkunu pprovduti mal-miters tal-ossiġnu. Għandek issegwihom b’mod strett. Il-miter jaħdem permezz ta’ batterija tal-karbonju taż-żingu, li għandha tipprovdi sa 400 siegħa ta’ użu kontinwu. Meta tingħata twissija ta’ batterija baxxa wieħed għandu jibdel u jqiegħed batterija oħra (tal-istess tip) malli t-twissija tkun attivata.

Il-moniters personali għal diversi gassijiet

Dawn il-moniters huma sensittivi ħafna u għandhom ikunu kkalibrati skont l-istruzzjonijiet tal-manifattur sabiex jibqgħu effettivi.
L-unità għandha tintbagħat lura lill-manifattur għall-manutenzjoni regolarment.
Huwa rrakkomandat li fil-kwartieri jinżamm reġistru tal-manutenzjoni għal ħames snin.

Tinsiex: QATT m’għandek tipprova tibdel il-batterija waqt li tkun f’post magħluq.